[东方报]英冠：英冠煞科戰升班席位爭崩頭[05-01]

英冠聯賽周六煞科，12場全部晚上7時30分開波，除咗高雲地利提早奪冠，以及牛津聯、李斯特城同錫周三篤定降班外，第2名直接升班資格，同埋第6名升班附加賽席位都未確定，兩條戰線牽涉球隊多達6隊，到時大家要睇實個積分表揀波。

先講亞軍席位戰場，排2至4位嘅葉士域治、米禾爾同米杜士堡都有機會，其中葉士域治佔絕對主動權，只要煞科日主場擊敗排14嘅昆士柏流浪，直接升班資格就到手，但如果葉士域治失手，就輪到米禾爾得米，佢哋主場對已降班嘅牛津聯，相信實食冇黐牙，至於米杜士堡不但要睇人面色，仲要作客對排第6嘅域斯咸，想直接升班有難度。

葉士域治贏波可重返英超
至於另一戰場係第6名之爭，頭先講過，排第6嘅域斯咸主場對米杜士堡，不但要贏，隨時仲要同第7位嘅侯城同分計得失球，侯城將會主場對排第9嘅諾域治，同樣係硬仗，如果域斯咸同侯城齊齊失分，機會就落喺排第8嘅打比郡身上，佢哋主場對排15嘅錫菲聯，等緊偷雞機會。