[东方报]歐冠：拜仁着晒火破門而出[04-28]

PSG遇「黑」星不寒而慄
今晚歐聯4強首回合激爆大戰，上屆盟主巴黎聖日耳門（PSG）主場硬撼德甲班霸拜仁慕尼黑。兩軍實力旗鼓相當，但拜仁近況稍勝一籌，加上近年碰頭食住PSG，首回合有力反客為主先拔頭籌，客勝有計。（Now 643周三凌晨3時直播）

PSG喺近兩圈歐聯連挫車路士及利物浦，無愧「英超剋星」之名，王牌奧士文尼迪比利、迪斯亞杜伊威力十足。不過呢支法甲豪門就特別驚拜仁，之前5次歐聯交手，PSG竟然全部輸晒兼僅入一粒，包括今屆聯賽階段多踢1人下，主場仍然以1比2敗陣，最大鑊係中場核心域天拿因傷上陣成疑，若然冇咗呢位中場「全能戰士」，攻守組織一定大打折扣。

域天拿或缺陣聖日耳門影響大
另邊廂，拜仁弗到冇朋友，各項賽事近17仗豪取16勝1和，日前聯賽對住緬恩斯落後3球劣勢下，下半場一踩油就狂風掃落葉反勝4比3，真係勒都勒唔住。單計歐聯，拜仁今屆12戰錄得11勝1負，包括8強雙殺「剋星」皇家馬德里，係佢哋自2012年後首次在淘汰賽踢走「銀河艦隊」，無論狀態或士氣都爆晒燈。

事實上拜仁火力可能屬全歐最強，哈利卡尼、路易斯迪亞斯及米高奧利斯等人着晒火，唔單止德甲提早封王，上周中亦擊退利華古遜殺入德盃決賽，連同歐聯劍指3冠王，今場作客強敵更會打醒精神，可乘勢先拔頭籌，客勝捧得過。